Из истории русской иерархии XVI века - архимандрит Макарий (Веретенников)

class="p1">Преже бо преставлениа своего архиепископ Феодосий за много время, познав свое от мира отхожение, повеле сотворити собе гроб и вся надгробнаа уготовити и свеща, яже на одре вжигают, и повеле жив во гроб положити ся, бе бо зело немощен телом, паче ногами. И рече в себе, во гробе лежа: Се покой мой… зде вселюся (ср.: Пс. 131, 14). И часто глаголаше от Божественнаго Писания умиленна глаголы: “Век мой, – рече, – скончевается, и страшный престол готовится, и житие мимо ходит, суд мене ждет”. Иногда же рече: “На путь бо иду долгий, по немуже николиже ходих, и в страну чюжю, идеже никто же знает мя”. Овогда же иныя умиленна словеса полезна: “Время ти есть омытися, о душе, и вся отрясти”. Правила же церковное сохраняя по уставу, никакоже преступив, и до последняго своего издыханиа: и келейный свой устав и правило и молитвы совершаа на всяк день, аще и в велицей болезни и тяжести от великих трудов и подвиг, бяше же телом преже крепок и мужествен. От многаго труда, и подвиг, и стоаниа – нозе его опухли бяше, якоже древие; он же овогда седя, овогда же лежа, молитвы и правило неослабно совершаа, паче же о целомудрии печашеся, бяше бо девственник, от рожениа не позна плотскаго греха, якоже и сам поведа нам, понеже евнух бе естеством плотню и зело о чистоте прилежаше и от помысл плотских и злых удалялся. И сего ради сподобися от Бога пророчества благодати, яко не токмо свое ко Господу отхожения познати, но и далняя, яко близ видети.

Того бо лета благоверный (и) христолюбивый царь и Великий князь Иван Василевич самодръжец, по благочестии поборник и христианский заступник, по Бозе ревностию разпалаем, восхоте ити на поганскиа языки и христианохулники: мерскиа латины, и жидове, и немъцы – на Полтеск град великий. Преже бо в Православии бяше град той, якоже летописцы поведают, и святыя церкви мъногия во граде том созданы быша и монастыри, якоже и чюдотворцы явишася и преподобная княгини Феврониа (так!) Полтская именовася и в святей велицей церкви Софии Премудрости Божии пребываше непрестанно, моляся Господеви, и место особно на полатех устроено бяше ей и до сего дни. Христианский же царь и государь и Великий князь Иван самодержец Рускиа Земля, не терпя многыя неправды поганых, и скверных онех озлобленна, и вере православной потреблениа и церквы Божиа запустениа, и христианскиа крови без вины проливаемы, и святых икон Христовых и Богородичных и святых всех попираемы и поругаемы, и в местех тех болваны и бездушные истуканы, сиреч идолы почитаемы, пойде со многым и безчисленым христолюбивым воиньством, с цари с подручными ему, и со князи, и воеводами, и храбрыми воины. Бяше бо тогда еще сияше благодать Божиа на Рускую Землю и изобильно на царство и гради христоименитых людей (у)множество много, якоже не мощи никому же противитися Богу помогающу нам. Царь же и государь, Великий князь помощию Божиею и Пречистые Богородицы и великих чюдотворцов, взем непобедимое оружие крестное, устремися на безбожных, вземлет же с собою и святителя, сиреч епископа, православным наставника, и честнейших архимандрит и преподобных игуменов великых и честных святых обителей, помощников духовныя молитвы и поборников, таже и нашего монастыря началника игумена Леонида в полк христоименитых приемлет. Игумен же прииде в келю ко архиепископу Феодосию благословитися по царьскому веленью ити со государем на безбожных. Он же, на одре лежа, мало восклонися и глаголя: “Бог да благословит тя, господине, на великое и царское дело, духовнаго воина: несть бо наша бран(ь) к крови и плоти по Апостолу, но ко владычеством и миродержителем тме века сего, к духовом злобе поднебесным (ср.: Еф. 6, 12)”. Таже и сам благословляетца от игумена и прощается по обычаю. И се прирече: “Мне уже, – рече, – с тобою последне (е)сть прощение и видение, на путь бо свой иду и долги, по немуже николиже ходих, и тебя уже мне не сождати во обитель”. И се рек, прослезися и отпусти игумена с миром.

Благоволением же Божиим и Промыслом Вышняго Царя, Имже царие царствуют (Притч. 8, 15) и миродержители дръжат землю, и молитвами Пречистые Богородицы и великих чюдотворцов руских и верою желанною и ревностию по благочестии и слезами государя нашего царя, Великаго князя Ивана Самодръжца и правдою, еще же и молением святейшаго Преосвященнаго Митрополита Макариа чюднаго и всего освященнаго Собора Рускиа Митрополиа Святые великиа Апостольскиа Церкви царю и государю державному Господь Бог даровал победу на поганых безсермен и на латин – град Полтеск взял и (епископа та, рек)ше бискупа, святителя их, сведе и всех людей, иже во граде хотящих обратитися к вере православнаго христианства, повеле приимати на покаяние и милость показа – не предавати на смерть. Неповинующихже ся царьскому его велению и веровати не хотящих – жестосердых жидов и лютавар злых и не покоривых латын, повеле огню и мечю предати. И тако отчину свою град великий Полтеск благочестия ревнитель царь и государь Великий князь от диаволскаго пленениа злые ереси исхытил и благочестие утвръдил и мно – гыя святыя церкви Христовы и Богородичны повеле воздвизати и святым всем в похвалу и славу Вседръжителю Богу и Пречистеи Его Матери и великим чюдотворцам. Се же бысть в лето 7 тысяч седм-десят первое [1563], месяца февраля в 20 день.

В царствующем же граде Москве и по всем градом Рускеа Земля еще не бе слышано бысть таковые великиа победы и всемирные радости благочестиваго царя и христолюбиваго воиньства далечняго ради разстояниа, бяше бо от царьствующаго града връст седмь сот. В который же убо день царь и государь град Полтеск пособием Божиим взял, в той же день архиепископ Феодосий и в монастыри Пречистые в кеде на одре лежаше в велицей своей болезни, не владый руками и ногами, но благодати пророческиа сподобися, глаголя сице: “Ныне убо великое дело сотворися благодатию и человеколюбием Божиим, царь и государь наш великий Иван Василевич всеа Русии самодержец Полтеск град взял и безбожных латин победил в сий день”. Бяше же день неделя сыропустная месяца февраля 20 день. Мы же слышаще, и дивитися начахом, глаголюще в себе, что убо глаголет старец, кто может ведати Божиа судбы, разве Святаго Духа благодать. Он же мало покоснев, рече к нам: “Что убо не веруете ли реченным о Подтеске, яко тако есть ложныя убо пророки камением побивати поведено есть и мене убо камением подобает побита, аще солжу, лжа убо от неприязни