Часослов с приложением (цсл) - Сборник

Кондак, глас 2:

Храм Твой всечестны́й я́ко цельбу́ душе́вную обре́тше, / вси ве́рнии велегла́сно вопие́м ти, / де́во му́ченице (имярек), великоимени́тая, / Христа́ Бо́га моли́ непреста́нно о всех нас.

МУЧЕНИЦАМ

Тропарь, глас 1:

А́гницы слове́сныя А́гнцу и Па́стырю, / приведо́стеся муче́нием ко Христу́, / тече́ние сконча́вше / и ве́ру соблю́дше. / Те́мже днесь ра́достною душе́ю соверша́ем, досточу́днии, святу́ю ва́шу па́мять, / Христа́ велича́юще.

Кондак, глас 4:

Страстоте́рпиц Христо́вых па́мять пра́зднуем, / и ве́рою прося́ще по́мощи / изба́витися всем от вся́кия ско́рби, зову́ще: / Бог наш с на́ми, / И́же сих просла́вивый, я́коже изво́ли.

ПРЕПОДОБНОЙ ЖЕНЕ

Тропарь, глас 8:

В тебе́, ма́ти, изве́стно спасе́ся е́же по о́бразу, / прии́мши бо Крест, после́довала еси́ Христу́, / и де́ющи учи́ла еси́ презира́ти у́бо плоть, прехо́дит бо, / прилежа́ти же о души́, ве́щи безсме́ртней, / те́мже и со А́нгелы сра́дуется, преподо́бная (имярек), дух твой.

Кондак, глас 2:

За любо́вь Госпо́дню, преподо́бная, / поко́я жела́ние возненави́дела еси́, / поще́нием дух твой просвети́вши: / кре́пко бо зве́ри победи́ла еси́; / но моли́твами твои́ми / проти́вных шата́ние разори́.

ПРЕПОДОБНЫМ ЖЕНАМ

Тропарь, глас 2:

И́стинному жела́нию уневе́стившеся, христосла́внии, / и вре́меннаго обру́чника отве́ргшеся совокупле́ния, / и доброде́тельными по́двиги возра́стше, / на высоту́ востеко́сте нетле́ния, / красноду́шнии и многобога́тнии, / столпи́ мона́шествующих жен и пра́вило, / те́мже о нас моли́те непреста́нно, / любо́вию ва́шу па́мять пра́зднующих.

Кондак, глас 2:

Телеса́ своя́ посто́м изнури́вше, / и неусы́пными моли́твами моля́ще Зижди́теля о гресе́х свои́х; / я́ко да прии́мете соверше́нное проще́ние, / и прия́сте боже́ственное оставле́ние / и ца́рствие небе́сное, / моли́те Христа́ Бо́га о всех нас.

ПРЕПОДОБНОМУЧЕНИЦЕ

Тропарь, глас 4:

А́гница Твоя́, Иису́се, (имярек) / зове́т ве́лиим гла́сом: / Тебе́, Женише́ мой, люблю́, / и, Тебе́ и́щущи, страда́льчествую, / и сраспина́юся, и спогреба́юся Креще́нию Твоему́, / и стражду́ Тебе́ ра́ди, / я́ко да ца́рствую в Тебе́, / и умира́ю за Тя, да и живу́ с Тобо́ю, / но я́ко же́ртву непоро́чную, приими́ мя, с любо́вию поже́ршуюся Тебе́. / Тоя́ моли́твами, / я́ко Ми́лостив, спаси́ ду́ши на́ша.

Кондак, глас 4:

Боже́ственная па́мять твоя́, (имярек), / днесь возсия́вши яви́ся ми́рови я́ко со́лнце, / сказу́ющи житие́ твое́: / ты бо воздержа́нием пло́тская двиза́ния разо́рши, / и страда́ния кро́вию уневе́стилася еси́ Христо́ви. / Те́мже хваля́щия тя изба́ви от вся́ких зол, да зове́м ти: / ра́дуйся, ма́ти преподо́бная.

ИСПОВЕДНИКУ

Тропарь, глас 8:

Правосла́вия наста́вниче, / благоче́стия учи́телю и чистоты́, / вселе́нныя свети́льниче, / архиере́ев Богодухнове́нное удобре́ние, / (имярек) прему́дре, / уче́ньми твои́ми вся просвети́л еси́, / цевни́це духо́вная. / Моли́ Христа́ Бо́га спасти́ся душа́м на́шим.

Кондак, глас 2:

Наслади́вся, богому́дре, воздержа́ния, / и жела́ния плотска́я ты успи́л еси́, / яви́вся ве́рою возраща́емь, / и я́ко живота́ дре́во ра́йское процве́л еси́, / (имярек), о́тче свяще́нный.

БЕЗСРЕБРЕННИЦЕМ И ЧУДОТВОРЦЕМ

Тропарь, глас 8:

Святи́и безсре́бреницы и чудотво́рцы (имярек), / посети́те не́мощи на́ша: / ту́не прия́сте, ту́не дади́те нам.

Кондак, глас 2:

Благода́ть прии́мше исцеле́ний, / простира́ете здра́вие су́щим в ну́ждах, / вра́чеве, чудотво́рцы пресла́внии, / но ва́шим посеще́нием / ра́тников де́рзости низложи́те, / мир исцеля́юще чудесы́.

ХРИСТА РАДИ ЮРОДИВЫМ

Тропарь, глас 1:

Глас апо́стола Твоего́ Па́вла услы́шав, глаго́лющ, / мы юро́ди Христа́ ра́ди, / раб Твой, Христе́ Бо́же, (имярек) / юро́д бысть на земли́ Тебе́ ра́ди; / те́мже па́мять его́ почита́юще, / Тебе́ мо́лим, Го́споди: / спаси́ ду́ши на́ша.

Кондак, глас 8:

Вы́шния красоты́ жела́я, / ни́жния сла́сти теле́сныя то́щно оста́вил еси́, / нестяжа́нием су́етнаго ми́ра, А́нгельское житие́ проходя́, / сконча́вся, (имярек) блаже́нне: / с ни́миже Христа́ Бо́га моли́ непреста́нно о всех нас.

КАТАВАСИЯ ВО ВСЕ ЛЕТО

глас 4.

Песнь 1:

Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

Песнь 3:

Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в боже́ственней Твое́й сла́ве / венце́в сла́вы сподо́би.

Песнь 4:

Седя́й в сла́ве / на Престо́ле Божества́ / во о́блаце ле́гце, / прии́де Иису́с пребоже́ственный, / нетле́нною дла́нию / и спасе́ зову́щия: / сла́ва, Христе́, си́ле Твое́й.

Песнь 5:

Ужасо́шася вся́ческая / о боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.

Песнь 6:

Боже́ственное сие́ и всечестно́е / соверша́юще пра́зднество, / богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.

Песнь 7:

Не послужи́ша тва́ри Богому́дрии / па́че Созда́вшаго, / но, о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог, благослове́н еси́.

Песнь 8:

О́троки благочести́выя в пе́щи / Рождество́ Богоро́дичо спасло́ есть; / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте, дела́, / и превозноси́те Его́ во вся ве́ки.

Песнь 9:

Всяк земноро́дный / да взыгра́ется, Ду́хом просвеща́емь, / да торжеству́ет же безпло́тных Умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице, чи́стая Присноде́во.

БОГОРОДИЧНЫ ВОСКРЕСНЫ НА ОСМЬ ГЛАСОВ ВСЕГО ЛЕТА

ГЛАС 1

Богородичен Догматик:

Всеми́рную сла́ву / от челове́к прозя́бшую / и Влады́ку ро́ждшую, / Небе́сную дверь / воспои́м, Мари́ю Де́ву, / Безпло́тных песнь и ве́рных удобре́ние: / Сия́ бо яви́ся не́бо и храм Божества́; / Сия́ прегражде́ние вражды́ разруши́вши, / мир введе́ и Ца́рствие отве́рзе. / Сию́ у́бо иму́ще ве́ры утвержде́ние, / Побо́рника и́мамы из Нея́ ро́ждшагося Го́спода. / Дерза́йте у́бо, дерза́йте, лю́дие Бо́жии, / и́бо Той победи́т враги́, / я́ко Всеси́лен.

На стиховне Богородичен:

Се испо́лнися Иса́иино прорече́ние: / Де́ва бо родила́ еси́ / и по рождестве́, я́ко пре́жде рождества́, пребыла́ еси́, / Бог бо бе Рожде́йся, те́мже и естества́ новопресече́. / Но, о Богома́ти, / моле́ния Твои́х рабо́в, / в Твое́м хра́ме приноси́мая Тебе́, не пре́зри, / но я́ко Благоутро́бнаго Твои́ма рука́ма нося́щи, / на Твоя́ рабы́ умилосе́рдися / и моли́ спасти́ся душа́м на́шим.

Богородичен отпустительный:

Гаврии́лу веща́вшу Тебе́, Де́во, ра́дуйся, / со гла́сом воплоща́шеся всех Влады́ка, / в Тебе́, святе́м киво́те, / я́коже рече́ пра́ведный Дави́д; / яви́лася еси́ ши́ршая Небе́с, / поноси́вши Зижди́теля Твоего́. / Сла́ва Все́льшемуся в Тя, / сла́ва Проше́дшему из Тебе́, / слава Свободи́вшему нас Рождество́м Твои́м.

ГЛАС 2

Богородичен Догматик:

Пре́йде сень зако́нная, / благода́ти прише́дши: / я́коже бо купина́ не сгара́ше опаля́ема, / та́ко Де́ва родила́ еси́ / и Де́ва пребыла́ еси́. / Вме́сто столпа́ о́гненнаго / пра́ведное возсия́ Со́лнце, / вме́сто Моисе́я, / Христо́с, спасе́ние душ на́ших.

На стиховне Богородичен:

О чудесе́ но́ваго всех дре́вних чуде́с! / Кто бо позна́ Ма́терь, без му́жа ро́ждшую / и на руку́ нося́щую всю тварь Содержа́щаго; / Бо́жие есть изволе́ние Ро́ждшееся. / Его́же я́ко Младе́нца Пречи́стая, / Твои́ма рука́ма носи́вшая, / и ма́тернее дерзнове́ние к Нему́ иму́щая, / не преста́й моля́щи о чту́щих Тя, / уще́дрити и спасти́ ду́ши на́ша.

Богородичен отпустительный:

Вся, па́че смы́сла, / вся пресла́вная Твоя́, Богоро́дице, та́инства, / чистоте́ запеча́танной и де́вству храни́му, / Ма́ти позна́лася еси́ нело́жна, / Бо́га ро́ждши И́стиннаго; / Того́ моли́ спасти́ся душа́м на́шим.

ГЛАС 3

Богородичен Догматик:

Ка́ко не диви́мся / Богому́жному Рождеству́ Твоему́, Пречестна́я, / искуше́ния бо му́жескаго не прие́мши, Всенепоро́чная, / родила́ бо еси́ без отца́ Сы́на пло́тию, / пре́жде век от Отца́ рожде́ннаго без ма́тере, / ника́коже претерпе́вшаго измене́ния, или́ смеше́ния, или́ разделе́ния, / но обою́ существу́ сво́йство це́ло сохра́ншаго. / Те́мже, Ма́ти Де́во Влады́чице, / Того́ моли́ спасти́ся душа́м, / правосла́вно Богоро́дицу испове́дающих Тя.