Мечта о русском единстве. Киевский синопсис (1674) - И. Сапожникова

71.

О КНЯЖЕНИИ МИХАИЛА

Всеволодовича в Киеве, и о нашествии злочестиваго Батыя.

ЛЕТА ОТ СОЗДАНИЯ МИРА 6748, от рождества Христова 1240, княжащу в Киеве Михаилу Всеволодовичу, присла злочестивый Батый Татаров своих соглядати Киева, и видевше величество и красоту его, удивишася, и возвращшеся поведаша Батыеви о преславном граде Киеве. Паки же Батый посла к Князю Михаилу прельщая его, да поклонится ему. Михаил же Князь поби послов Батыевых, а сам побеже из Киева в Угры. Тогда Ростиславичь, внук Давида Смоленскаго, услышавши, яко несть Князя в Киеве, прииде и седе в нем на княжении, егоже Данило Мстиславичь, внук Мстислава сына Изяславова, изгна из Киева и посади в нем Воеводу своего именем Димитра, и заповеда ему да хранит града и всячески бранит. Прииде же проклятый Батый с силою многою под Киев и обступи его, и нача пороки (машины) ставити и бити в стены градския. Людие же из града крепко бранишеся, а потом окрест Десятинныя Церкве Пресвятыя Богородицы окопашася, и на палаты Церковныя много людей возбегоша, яко от тяжести их палаты обвалишася и многих побиша: а Татаре всея России Стольный и по всей подсолнечной славный Царственный град Киев взяша, Церкви божественныя разориша, город и место огнем сожегоша, людей иных посекоша, а иных плениша, и все Государство Киевское ни во что обратиша, и Богу тако грех ради человеческих попустившу.

72.

О РАЗОРЕНИИ ПРЕКРАСНЫЯ

Святыя Великия чудотворныя Лавры Печерския Киевския.

ТОГОЖ ЛЕТА ЗЛОЧЕСТИВЫЙ Батый разоривши преславный град Киев, прииде с погаными своими и к Святой Обители Печерской, идеже множество народа бе в затворе, и мужественно противу того врага Креста Господня места ради святаго стояше: но грех ради не возмогоша Христиане отбитися и уцелити. Ибо нечестивии варвары овнами, или таранами стены каменныя Монастырския столкши и до основания сокрушивши, в Святую Обитель внидоша, людей всякаго чина посекоша, иных плениша, и самую Небеси подобную Церковь Пресвятыя Богородицы Печескую оскверниша, от всего украшения обнажиша и Крест с главы Церковныя златокованый сняша, а верх до полуцеркве по окна повелением проклятаго Батыя испровергоша; такожде и верх олтаря великаго по перси иконы пресвятыя Богородицы избиша, и весь Монастырь со всеми украшениями и каменными стенами до основания искорениша и разметаша, яко о том подробну в древних Летописех Руских обретается; и от того времени преукрашенныя Божиею славою Девы обитель Святая Печерская до своего перваго бытия и красоты древния не возможе приити. Ибо нынешнее строение далече разно есть от перваго. Любящих же благолепие храма Богоматере иных смерть своею посече косою, иных нашествия иноплеменник мечь пояде, иным междоусобныя брани нестроение препятие содела: а ныне изрядным промышлением о всем православнороссийском народе, блаженныя памяти благочестивейшаго Государя нашего Царя и Великаго Князя Алексея Михайловича, всея Великия и Малыя и Белыя России Самодержца, и по нем наследника его Государева, Великаго Государя нашего Царя и Великаго Князя Феодора Алексеевича, всея Великия и Малыя и Белыя России Самодержца, благополучно царствующаго, красуется и всякия исполнена есть надежды.

73.

О БЛАГОВЕСТЕ

во Святой Обители Печерской к Церковному служению, откуду он начася.

АЩЕ ОТ ЗЛОЧЕСТИВАГО Батыя в конечное разорение Святая Обитель Печерская прииде, и Небеси подобная Церковь Успения Пресвятыя Богородицы чрез многия лета пребываше в запустении: но в некоем Придельце, уцелевшем от поганых, Божественныя Службы страха ради в тайне совершахуся; Черноризцы же по лесах и вертепах скитающеся даже до обновления Церкве и Монастыря пребываху и в Соборе на службу Божию к Церкве прихождаху. Сего ради уставиша един мал звон, благовест нарицаемый, и непочасту в он ударяти, но надолзе, да все благовест он удобее слышат и от далеких и подземных мест сходитися к Церковному служению возмогут.

74.

О ЛЕТЕХ, В НИХ ЖЕ КИЕВСКОЕ КНЯЖЕНИЕ

и всея России самодержавствие под Татарским пребысть игом.

ОТ НАШЕСТВИЯ ЗЛОЧЕСТИВАГО Батыя в Российскую Землю и от разорения преславнаго Царственнаго града Киева все Князие Российскии под поганския власти игом чрез полтораста лет пребываху и от Татарских Царей по воле их и хотению на Княжения бяху саждены; не повинующиижеся извержени бываху и всякие суды и споры главные Татарове творяху и совершаху. А от тых же Батыевых Татар прочии избраша себе селение в Крыме и Перекопе, и обладаша всеми окрестными полями; а Христиан оттуду изгнаша; а за Киевом все дикия поля далече лежащия и Подолье все, Литовским землям прилежащее, держаху, и Баскаки или Атаманы своя, аки бы Старосты, над Россами имеяху, иже и дани от них взимаху, и аки Государи Христианами обладаху, дондеже их поганую силу Великий благочестивый Князь Димитрий Московский победи и Мамая Царя Татарскаго на главу порази, яко на тринадесять миль, а верст на шестдесят и пять трупы поганские лежаша. О толикой победе, понеже ключися зде от части воспомянути, сего ради и известнее ю, яко достославную, судися за благословную вину на вечную память грядущим родом написати, да и прочии Христоименитии вои, ревнующе толикому древних витязей храброму против нечестиваго Мамая мужеству, дерзновенно и сами подвизаются на врагов Креста Святаго силою на нем пригвожденнаго Христа Господа укрепляемы.

75.

О ИЗВЕЩЕНИИ ВЕЛИКОМУ

Князю Димитрию, яко нечестивый Мамай идет войною на Русь.

ВЕЛИКИЙ БЛАГОВЕРНЫЙ Князь Димитрий Ивановичь Московский услышавши, яко идет на него безбожный Царь Татарский Мамай с многими силами, неуклонно яряся на Веру Христову и народ Христианский, ревнуя погибшему Батыю скверному прародителю своему, опечалися вельми, и востав иде пред икону Христа Спасителя Миру, и падши на колена, нача с слезами молитися, да простит милостивый Бог грехи его и избавит Землю Росскую от безбожнаго Мамая. По молитве же воздвигшися, скоро посла по брата своего Князя Владимира к Боровску и по вся Князи, Боляре и Воеводы. Князь же Владимир прииде на Москву вскоре, и видев Великий Князь Димитрий брата своего, извести ему скорбь свою от нахождения поганых. Князь же Владимир соболезнуя толикой скорби, отвеща Великому Князю утешая его, глаголющи: на Господа возверзи печаль свою, и той тя препитает; нам же, Государю, лучше есть почетную смерть подъяти, нежели срамотень живот видети. Тогда Князь Великий Димитрий, поемши брата своего, пойде к Преосвященному Митрополиту Киприану и извести ему настоящую беду, яко безбожный Царь Мамай идет на Русь. Митрополит же отвеща ему глаголя: Божиим то попущением грех ради наших воста на ны нечестивый он Царь. Ты же, Государю, потщися прежде послати к нему дары и теми гнев его укроти, еда смирится и не пойдет Земли нашея пустотити. Аще же того ради не смирится, то Господь сам, имиже весть судбами, смирит его, яко Господь гордым противится, смиренным же дает благодать. Тако бо и Святый Василий Великий сотвори иногда, послав дары законопреступнику Иулиану, хотящу град его разорити, да утолится от ярости своея: но егда отступник он не преста от погибельныя ярости своея, абие сам Господь Бог на отмщение толикаго неблагодарствия посла воина своего, Святаго мученика Меркурия, да убиет гонителя невидимо, еже и собыстся.

76.

О ПОСЛАНИИ ОТ ВЕЛИКАГО

Князя Димитрия даров к Мамаеви.

ВЕЛИКИЙ КНЯЗЬ Димитрий, повинувшися совету Митрополитову, избраннаго и благоразумнаго от предстоящих своих именем Захарию Тутчева, или Тушинина, посла с многими дарами к Мамаю, придавши ему и два толмача. Захария же дойде земли Резанския, и слышав, яко Олег Резанский и Олгерд Литовский приложилися к Мамаю, посла тайно к Великому Князю, извещая о толиком своих другов неприятелстве. Князь же Великий слышав то, нача сердцем двизатися и исполньшися печали, помолися Господеви глаголя: Господи Боже мой! на единаго тебе надеюся правду любящего. Аще бы враг пакости деял, претерпел бых; яко бо искони враг есть роду Христианскому.

Сии же друзи и искрении мои тако на мя умыслиша. Суди же, Господи, по правде межи има и межи мною, да скончается злоба грешных. По молитве пойде Великий Князь с братом своим к Преосвященному Митрополиту и поведа ему о преложении Ольга Резанскаго и Олгерда Литовскаго к Мамаю, глаголя с плачем: согреших, Отче Святый пред Богом: но им никоея обиды не сотворих. Доволен бо есмь своим княжением; не вем же, чесо ради умножишася стужающии ми. Отвеща же Митрополит, яко суетная их вражда и неправедное восстание на мя, Княже Великий; сего ради не скорби, но просветися веселием о Бозе помощнице своем. Той тя избавит и прославит. Аще бо, Государю, человека хранит Бог, то не может его весь Мир убити; от крепкия же руки его и от всевидящаго ока владычняго где мощно укрытися и избыти? и теми словесы Архиерейскими укрепися Великий Князь Димитрий и на Господа печаль свою возложи.